நாடாளுமன்றத்தில் கடந்த 2 ஆண்டுகளாக 2 ஆயிரம் ரூபாய் நோட் அச்சடிக்கவில்லை என்று மத்திய அரசு தகவல் தெரிவித்துள்ளது.

நாடாளுமன்ற மக்களவையில் நாடாளுமன்ற உறுப்பினர் ஒருவர் 2 ஆயிரம் ரூபாய் நோட்டு அச்சடிக்கப்படுகிறதா? என்று கேள்வி எழுப்பி இருந்தார். அதற்கு மக்களவையில் மத்திய நிதித்துறை இணையமைச்சர் அனுராக் தாக்கூர் எழுத்துப்பூர்வமாக பதில் அளித்துள்ளார்.

அதில் அவர் கூறியிருப்பதாவது, 2018 மார்ச் 30ம் தேதி நிலவரப்படி நம் நாட்டில் 336.2 கோடி 2 ஆயிரம் ரூபாய் நோட்டு புழக்கத்தில் இருந்தது. மேலும் 2021 பிப்ரவரி 26ஆம் தேதி நிலவரப்படி இது 249.9 கோடியாக குறைந்துள்ளது.

மத்திய அரசு, குறிப்பிட்ட மதிப்பிலான ரூபாய் நோட்டுகளை அச்சடிப்பது பற்றி ரிசர்வ் வங்கியுடன் ஆலோசித்துதான் முடிவு எடுக்கும். 2016-17ம் நிதியாண்டில் (2016 ஏப்ரல்- 2017 மார்ச்) 354.29 கோடி 2 ஆயிரம் ரூபாய் நோட்டு அச்சடிக்கப்பட்டது.

மேலும் 11.15 கோடி 2 ஆயிரம் ரூபாய் நோட்டு மட்டுமே 2017-18ம் நிதியாண்டில் அச்சடிக்கப்பட்டது. இது 2018-19ம் நிதியாண்டில் 4.66 கோடியாக குறைந்து உள்ளது.

கடந்த இரண்டு ஆண்டுகளாக(2019 ஏப்ரல் முதல்) 2 ஆயிரம் ரூபாய் நோட்டு புதிதாக ஏதும் அச்சடிக்கப்படவில்லை என்று அதில் தெரிவிக்கப்பட்டுள்ளது. 2,000 ரூபாய் நோட்டு அச்சடிக்காமல் இருப்பது, அதிக மதிப்பிலான பணத்தை கருப்பு பணமாக பதுக்கப்படுவதை தடுக்க மத்திய அரசு மேற்கொண்ட நடவடிக்கையாக கருதப்படுகிறது.