- அண்ணா பல்கலைக் கழக இணையவழி செமஸ்டர் தேர்வு முடிவுகளில் ஏற்பட்ட குளறுபடிகளால் பொறியியல் கல்லூரி மாணவர்கள் மிகுந்த மன அழுத்ததில் இருக்கிறார்கள்.
- செமஸ்டர் தேர்வு முடிவுகளுக்கு அண்ணா பல்கலைக் கழகம் இதுவரை முறையான விளக்கம் ஏதும் அளிக்கவில்லை என்று அண்ணா பல்கலைக் கழகம் மீது பொறியியல் கல்லூரிகள் கடும் அதிருப்தியில் இருக்கிறது.
- பொறியியல் மாணவர்களுக்கு கடந்த ஆண்டு நவம்பர் மற்றும் டிசம்பர் மாதங்களில் நடக்க இருந்த செமஸ்டர் தேர்வுகள், கொரோனா பரவல் காரணமாக அண்ணா பல்கலைக்கழகம் தள்ளி வைத்தது.
- இந்த செமஸ்டர் தேர்வுகள் கடந்த பிப்ரவரி, மார்ச் மாதங்களில் இணையவழி மூலம் நடத்தப்பட்டது. இந்த தேர்வில் 4 லட்சத்துக்கும் அதிகமான மாணவ, மாணவிகள் கலந்து கொண்டார்கள்.
- இந்நிலையில் கடந்த 11-ம் தேதி பிஇ, பிடெக், மற்றும் எம்இ, எம்டெக் படிப்புகளில் 2-ஆம் ஆண்டு, 3-ஆம் ஆண்டு மற்றும் இறுதி ஆண்டு மாணவர்களுக்கான தேர்வு முடிவுகளை அண்ணா பல்கலைக்கழகம் இணையதளத்தில் வெளியிட்டது.
- இந்த தேர்வு முடிவில் ஒரு லட்சத்துக்கும் அதிகமான மாணவர்களுக்கு தேர்வு எழுதிய பாடத்துக்கு அருகே தேர்ச்சி அல்லது தோல்வி என்று குறிப்பிடாமல், ‘நிறுத்திவைப்பு’ என்பதை குறிக்கும் விதமாக WH (With held) என்று குறிப்பிடப்பட்டு இருக்கிறது.
- இதனால், மாணவர்கள், ஆசிரியர்கள், பெற்றோர்கள் அதிர்ச்சி அடைந்துள்ளார்கள். இணையவழி தேர்வில் சுமார் 30 ஆயிரம் மாணவர்கள் முறை கேட்டில் ஈடுபட்டதாக கூறப்படுகிறது.
அரசு மற்றும் தனியார் பொறியியல் கல்லூரி பேராசிரியர்கள் கூறியதாவது:
- தேர்வில் முறைகேட்டில் ஈடுபட்டதாக அறியப்பட்ட 30 ஆயிரம் மாணவர்கள், மேலும் முடிவுகள் நிறுத்தி வைக்கப்பட்ட ஒரு லட்சம் மாணவர்கள் தவிர, மீதமுள்ள மாணவர்களில் 30 சதவீதத்துக்கும் குறைவாகவே மாணவர்கள் தேர்ச்சி பெற்று இருக்கிறார்கள்.
- இதுபோன்ற மோசமான தேர்வு முடிவுகள் இதுவரை வந்ததில்லை. நன்றாக படிக்கும் மாணவர்கள் கூட இந்த தேர்வில் தேர்ச்சி பெறவில்லை.
- இதனால், பொறியியல் கல்லூரிகளே குழப்பத்தில் இருந்து மீளாமல் இருக்கிறது. இந்த தேர்வு முடிவு மாணவர்களுக்கு மிகுந்த மன அழுத்தத்தை ஏற்படுத்தி உள்ளது.
- இந்த இணையவழி தேர்வு முடிவுகள் குறித்த குளறுபடிகளுக்கு விளக்கம் அளிக்கும் வகையில் அதிகாரப்பூர்வ அறிவிப்பை அண்ணா பல்கலைக் கழகம் வெளியிட வேண்டும் என்று கூறுகிறார்கள்.
இதுதொடர்பாக கல்வியாளர் ஜெயபிரகாஷ் காந்தி கூறியதாவது;
- தேர்வில் ஒரு மாணவர் முறை கேட்டில் ஈடுபடுவதாக சந்தேகம் எழும்போதோ அல்லது வழிமுறைகளை பின்பற்றாத போதோ சம்பந்தப்பட்ட மாணவரிடம் அண்ணா பல்கலைக்கழகம் எச்சரிக்கை விடுத்து இருக்க வேண்டும்.
- இதன்முலம் மற்ற பாடங்களின் தேர்வுகளையாவது அந்த மாணவர் முறையாக எழுதி இருப்பார். இந்த தேர்வில் 2 மாதம் கழித்து முறைகேடு சந்தேகம் வருவது நியாயமில்லை.
- கல்லூரிகள் தேர்வு கட்டணம் செலுத்தாமல் இருப்பதால், மாணவர்களின் முடிவுகளை வெளியிடாமல் இருப்பது தவறான முன்னுதாரண மாகும்.
- கல்லூரி மாணவர்களின் குழப்பத்தை தீர்க்க உதவும் வகையில் அண்ணா பல்கலைக்கழகம் ‘உதவி மையம்’ அமைக்க வேண்டும். அதேபோல அண்ணா பல்கலைக்கழகம் பொறியியல் கல்லூரிகளுக்கு சரியான விளக்கம் அளிக்க முன்வர வேண்டும் என்றும் கூறினார்.
அண்ணா பல்கலைக்கழக தேர்வு கட்டுப்பாட்டு அதிகாரி
- இந்த தேர்வு முடிவு குறித்து அண்ணா பல்கலைக்கழக தேர்வு கட்டுப்பாட்டு அதிகாரிகளிடம் கேட்டபோது, இணையவழி செமஸ்டர் தேர்வு முடிவுகளில் உள்ள குழப்பத்தை கருத்தில் கொண்டு மறுமதிப்பீடு செய்ய அண்ணா பல்கலைக்கழகம் திட்டமிட்டு இருக்கிறது.
- மேலும் முறைகேடு குற்றச்சாட்டுக்கு ஆளான மாணவர்களின் செயல்பாடுகளை குறித்து கல்லூரி அளவில் விசாரிக்க முடிவு செய்யப்பட்டுள்ளது.
- இதுதொடர்ப்பாக கல்லூரி தரப்பில் தரப்படும் விளக்கங்களின் அடிப்படையில் அந்த மாணவர்களுக்குத் தேர்வு முடிவு அறிவிக்கப்படும் என்று கூறினார். மேலும் முறைகேட்டில் ஈடுபடாத மாணவர்கள் அச்சப்படத் தேவையில்லை என்றும் கூறியுள்ளார்.
